Sahara Club

Mamá se baxa bella begada flors d’o güerto enta o piso que tenemos en Zaragoza.

Las preba de tresplantar en mazetas y, cuan se li machurren, a mai diz que “fan sentimiento”. Y ye berdá que ixo pasa tamién con as presonas. Nayim, saharahui, dimpués de tornar de Cuba, ye como ixas flors que tresplantas y no toman, fa duelo, no chita, fa sentimiento.

Dezisiete años cumplius teneba cuan ya brincó de casa. Se dexaba lebar por a bida. Miraba de pillar atra endrezera.

O desierto no ye puesto ta una mulata d’o ballet d’a Tropicana. Os autos royos en o malecón s’aturan en l’arena, as melfas buelan en l’aire d’a nuei, con un aire callén como l’atro, ixo sí. Suenan en as jaimas trompetas, pianos, sacsofons… S’ubre o telón, colors, mulatas, garras á l’aire, plumas… Santiago de Cuba.

Dunas d’imáchens, borguils de parolas, de cantas caribeñas que escambian d’orilla, a zentura de Ludmila…

Dimpués, Zaragoza, á treballar en o bar Sahara Club, nueis, buquizos, copas, fillos de puta, mosica, malinconía, muita malinconía. Sin de pasaporte ni bisau, aguardando, sin olbidar, ixo sí. Lo ha pasau mal.

Güei dexará que s’empuerquen os cristals con ista plebia que traye barrechada arena d’o desierto. Dexará que s’apegue y s’asole en os cristals ta, cuan espaze, ir replegando-la y metendo-la en un pote chicorrón que tiene ta guardar ixos repuis d’arena que li traye, de cabo cuan, l’aire callén d’o sur.

(Óscar Latas Alegre, Chuegos florals. Repuis d’asperanza y malinconía. Zaragoza, Gobierno de Aragón, 2012, p. 85).