Güello de paxaro (2013). Publicazions d’o Consello d’a Fabla Aragonesa.
Chusé Antón Santamaria Loriente
En os pentagramas
de filos dorados
os paxaros meten
as suyas notas
en clau de sol.
O timbre resuena
en as ninetas d’os
güellos d’iste maitín
que s’escotola.
¿Qui manulla
o diapasón?
As alas d’as falzetas
esgarrapan os parpiellos
de l’alba.
Espuntes d’o sol.
Cucús de maitinada.
Esparbels de meyodía.
Muxons de tardada.
Creyazión.
Re-creyazión.
D’entre as boiras
un rayo de sol
caye en as oliberas
de plata.
Foco enzegallador.
Eslambio de fulgor.
Inzendio devorador.
Plebia d’oro que
podeba fecundar
a Danae.
Solanera.
Primer chemeco
de luz
en as yedras.
O día nos plega
como un mozet
que ploriconía.
Una man azul
replega as boiras
que s’achantan
en os güellos d’os
críos que aún
ensuenian.
En o ziazo de
luz
o sol tixidor
contina bordando
con diamantes
de fuego os
campos de trigo.
Rayadeta de
sol
prima lux d’o
día.
Claror de mármol
espullato.
Zielo augua
marina.
¿A luz traye os paxaros
u os paxaros trayen a luz?
Punta d’o día.
Una polbarera
d’augua chelata
caye abonico.
Glarimas d’Eos
que plora en a
yerba a muerte
d’o suyo fillo
Estrelas cristalizatas.
Rosada.
Dondiaré como
un flayo embelecato
e continaré,
Tantalo afatuato,
buscando as trías
de luz cobriza
que a tuya
nabata dorada
ba dixando, perén,
en un mar de níquel.
Asociación Aragonesa de Escritores 